287 Neiinfektiounen

Um Donneschdeg waren 287 vun 11.485 Tester positiv - dat entsprécht engem Positivitéitstaux vun 2,50 Prozent. De Reproduktiounstaux läit bei 0,93. Eng weider Persoun ass un de Suitte vun enger Covid-19-Infektioun gestuerwen. 

 4.821 Leit kruten eng Impfung, 2.460 dovunner déi zweet Dosis.

Aktuell sinn 131 Leit wéinst Covid-19 hospitaliséiert, 29 dovunner op der Intensivstatioun. Aktuell huet Lëtzebuerg ee Patient vu Frankräich op der Intensivstatioun opgeholl.

AstraZeneca gëtt a ville Länner manner agesat

Den Hin an Hier ëm den Impfstoff vun AstraZeneca geet weider, obwuel déi europäesch Medikamentenagence EMA recommandéiert huet, en ouni Limitatioun fir Alter a Geschlecht ze gebrauchen.

Holland awer huet elo decidéiert, en nach just un Leit, déi méi al wéi 60 Joer sinn ze ginn, dat selwecht gëlt fir Portugal. Italien a Spuenien haten deementspriechend Decisioune scho virgëschter geholl.

387 Neiinfektiounen

E Mëttwoch waren 387 vun 13.579 Tester positiv - dat entsprécht engem Positivitéitstaux vun 2,85 Prozent. De Reproduktiounstaux läit bei 0,63.

 4.376 Leit kruten eng Impfung, 2.013 dovunner déi zweet Dosis.

Aktuell sinn 140 Leit wéinst Covid-19 hospitaliséiert, 31 dovunner op der Intensivstatioun. Aktuell huet Lëtzebuerg ee Patient vu Frankräich op der Intensivstatioun opgeholl.

 An de leschte 24 Stonnen ass keng weider Persoun un oder mam Coronavirus gestuerwen. Domat bleift de Bilan zanter dem Ufank vun der Pandemie zu Lëtzebuerg bei 762 Doudesfäll.

WHO: Ze wéineg Impfstoff fir Afrika

Manner wéi zwee Prozent vun alle weltwäit ausgeliwwerten Impfdosisse si bis ewell u Leit an Afrika verdeelt ginn. Indien, wou eigentlech den Impfstoff dohinner liwwere sollt, huet opgrond vun der zweeter Corona-Well den Export vum Vaccin gestoppt. D’Weltgesondheetsorganisatioun kritiséiert dës schlecht Versuergung vun Afrika mat Impfstoff. Et goufe bis ewell 4,3 Millioune Covid-19-Fäll an Afrika registréiert, vun deene ronn 114.000 Mënschen d’Infektioun net iwwerlieft hunn.

Lescht Woch insgesamt 344 Fäll an de Schoulen

An de Schoule goufen et an der Woch vum 29. Mäerz op de 4. Abrëll insgesamt 344 Corona-Fäll vum Zenario 1 an am Ganzen 83 Grondschoulen, 45 Lycéeën an dräi Centre de compétences, dat deelt den Educatiounsministère haut mat. Et handelt sech hei ëm Infektiounen, déi an d’Schoul eragedroe goufen an do net viru gaange sinn.

46 Fäll goufen am Zenario 2 gezielt, 25 am Zenario 3, also Fäll mat 3 bis 5 Infizéierte pro Klass. Et goufen an deem Zäitraum keng Infektiounsketten an de Schoule festgestallt. Betraff waren am Ganzen 299 Schüler a 45 Enseignanten.

Wat de Large-Scale-Testing betrëfft, dee vum 29. Mäerz bis den zweeten Abrëll zu Déifferdeng an de Schoulen duerchgefouert gouf, esou koumen do zéng positiv Fäll bei insgesamt 3708 geteste Persounen.

CGDIS: Bis elo 1.600 Leit geimpft

Beim CGDIS si scho ronn 1.600 Leit beim CGDIS geimpft ginn. 2.145 Persounen hu bis elo eng Invitatioun kritt. Dat äntweren déi zwou Ministerinne Paulette Lenert an Taina Bofferding op eng parlamentaresch Fro vum Piraten-Deputéierte Sven Clement. An der Moyenne géifen 200 Persounen an der Woch eng Invitatioun kréien. Ongeféier 80% dovu géife sech och effektiv impfe loossen. Ausserdeem géifen déi eenzel Impfzentren um Enn vum Dag den 112 kontaktéieren, wann Impfdosisse Rescht sinn. Da kënne Leit vum CGDIS, déi nach net geimpft sinn, an een Impfzenter fuere fir déi Dosissen ze kréien.