Krich am Noen Osten

3. June 2026 13:43

Iwwer 60 Blesséierter bei Attacken op Kuwait

Duerch d'Explosiounen um Fluchhafe vu Kuwait duerch iranesch Dronenattacke sinn op d'mannst 63 Mënsche blesséiert ginn. Eng weider Persoun ass ëm d'Liewe komm, wéi de Gesondheetsministère vu Kuwait matdeelt.

Iwwerdeems sinn am Libanon bei israeeleschen Attacken zwee Ambulancieren ëm d'Liewe komm.

3. June 2026 10:36

Iranesch Attacken op Kuwait

De Golfstaat Kuwait mellt iranesch Dronen-Attacken, déi de Fluchhafe getraff hätten. Et hätt e puer Blesséierter an héije Materialschued ginn, esou d‘Arméi am Kuwait. De Fluchverkéier gouf bis op Weideres suspendéiert.

Do virdrun haten d‘USA scho gemellt, datt si ballistesch Rakéiten an Dronen interceptéiert haten, déi den Iran op Kuwait a Bahrain geschoss soll hunn.

Am Géigenzuch hätten d‘USA defensiv Militäraktioune géint eng Buedemstatioun vun der iranescher Arméi op der Insel Queshm duerchgeféiert.

3. June 2026 06:27

Trotz Wafferou hunn d'USA an den Iran sech géigesäiteg attackéiert

Déi amerikanesch Arméi huet eegenen Aussoen no e puer ballistesch Rakéiten an Dronen interceptéiert, déi den Iran op Kuwait a Bahrain geschoss hätt. A béide Länner sinn amerikanesch Militärbasen. Déi wieren awer net getraff ginn.

Am Géigenzuch hätten d‘USA defensiv Militäraktioune géint eng Buedemkontrollstatioun vun der iranescher Arméi op der Insel Queschm duerchgeféiert.

2. June 2026 16:38

Trump soll d'Beherrschung verluer hu bei Gespréich mam Netanjahu

US-Medie mellen, datt den Donald Trump wéinst den Drounge vun Israel fir Beirut unzegräifen, an engem Telefonsgespréich mam israeelesche Premier Benjamin Netanjahu komplett d‘Beherrschung verluer hätt.

Hien hätt den Netanjahu vernannt a gesot, datt hien "total verréckt" wier an datt "jiddereen hien elo géif haassen", esou den Noriichtensite Axios.

Aus Kreesser ronderëm den Netanjahu heescht et, d‘Gespréich wier ugespaant gewiescht mee et hätt keng perséinlech Ugrëff ginn.

2. June 2026 13:24

Trump gëtt gréng Luucht fir Banlieue vu Beirut unzegräifen

Den israeelesche Verteidegungsminister Israel Katz seet, den US-President Donald Trump seng Zoustëmmung ginn, fir Deeler vu Beirat am Libanon ze attackéieren. Dat, obwuel eng Wafferou gëllt. Israeeleschen Aussoen no ass an deene Banlieuen eng Héichbuerg vun Hisbollah-Kämpfer.

2. June 2026 07:06

Hisbollah hätt Plang acceptéiert Israel net unzegräifen

De Libanon seet, datt d‘Hisbollah een amerikanesche Plang acceptéiert huet fir Israel net méi unzegräifen. Am Géigenzuch soll Israel déi libaneesesch Haaptstad Beirut och net méi ugräifen.

Déi libaneesesch Ambassade an den USA sot, si hätt confirméiert kritt, datt d‘Hisbollah déi amerikanesch Propos fir e géigesäitege Stopp vun den Attacken acceptéiert hätt.

Den israeelesche Premier Benjamin Netanyahu huet den Accord confirméiert. Hien huet awer gewarnt, datt wann d‘Hisbollah sech net un den Accord hält, géif Israel, wéi virdru schonn annoncéiert, Positioune vun der Hisbollah an der Banlieue vu Beirut ugräifen.

1. June 2026 18:12

Xavier Bettel reagéiert op israeelesch Attacken am Libanon

Déi israeelesch Attacke wieren net ze rechtfertegen, esou den Ausseminister op der Plattform X. De Xavier Bettel rifft Israel, an d'Hisbollah-Miliz op, d'Waffen néierzeleeën.

1. June 2026 16:49

Verhandlungen tëschent Iran an USA op Äis geluecht

Dat wéinst de "Verbriechen", déi Israel weider am Libanon géif begoen. Dat mellt eng iranesch Noriichtenagence. Den Iran huet haut op en Neits betount, datt all Accord mat den USA fir een Enn vum Krich am Noen Osten och un eng Wafferou am Libanon gebonne wier. Do geet Israel jo géint déi pro-iranesch Hisbollah-Miliz vir - a bombardéiert ëmmer nees Ziler, bei deenen och Zivilisten ëm d'Liewe kommen.

Wéinst der Meldung vum Aussetze vun de Verhandlunge sinn d‘Petrolspräisser erëm geklommen. De Baril Brent ass am Nomëtteg op der Bourse zu Paräis op e bësse méi wéi 97 Dollar geklommen.

1. June 2026 14:28

Israel wëllt Süde vu Beirut ugräifen

An de Banlieue vum Süde vu Beirut wier eng Héichbuerg vun der Hisbollah-Miliz, seet Israel. D'Géigend ass awer ganz idcht bewunnt. Israel verstäerkt domat d'Buedemoffensiv op de Libanon, a réckelt och am Norde weider vir.

Dem franséischen Ausseminister no géif d'"Besetzung vum Libanon" domat weidergoen.

1. June 2026 12:00

Trotz Waffestëllstand a weidere Verhandlungen: Erëm géigesäiteg Attacken tëschent den USA an dem Iran

De Moien huet déi iranesch Revolutiounsgarde annoncéiert, datt si eng US-Militärbase am Kuwait mat Dronen a Rakéiten ugegraff hätt.

Iwwer de Weekend haten d‘USA iranesch Radar- a Drone-Kontroll-Systemer ugegraff.

Wat d‘Verhandlunge fir en Enn vum Krich uginn, huet den Iran widderholl: Eng Konditioun fir en Accord mat den USA wier e Waffestëllstand am Libanon, deen och vun Israel respektéiert misst ginn.

Am Iran goufen et weider Hiriichtungen

Zënter Méint gi Mënschen an Zesummenhang mat de Masseprotester am Januar, higeriicht. De Moie sinn zwee weider Männer exekutéiert ginn.